Украінскі праект «Хачу жыць» апублікаваў фота ўкраінца, які вярнуўся дадому ў выніку абмену палоннымі, што прайшоў 31 траўня. Мы папярэджваем, што гэтыя фатаграфіі могуць шакаваць уражлівых людзей.
«На гэтых страшных фота — украінец Гарылык Раман Васільевіч пасля двух гадоў знаходжання ў расійскім палоне», — расказалі ў праекце.
Там адзначаюць, што Гарылык не браў удзелу ў ваенных дзеяннях, ён займаў пасаду старшага кантралёра па ахове Чарнобыльскай атамнай станцыі. Яго і іншых 168 нацгвардзейцаў, якія ахоўвалі ЧАЭС, расійскія салдаты забралі з сабой падчас адступлення і вывезлі з Украіны праз Беларусь у сакавіку 2022 года.
З таго часу дадому ўдалося вярнуць крыху больш за палову — 89 нацгвардзейцаў дагэтуль знаходзяцца ў расійскім палоне.
«Стан Рамана і іншых украінскіх ваеннапалонных выклікае жах і асацыяцыі з самымі цёмнымі старонкамі гісторыі чалавецтва — нацысцкімі канцэнтрацыйнымі лагерамі смерці. За ўвесь час знаходжання ў расійскім палоне Рамана і іншых 74 ваеннапалонных украінцаў, вернутых праз абмен, ні разу не наведвалі назіральнікі Міжнароднага Камітэта Чырвонага Крыжа. Не пускаць назіральнікаў да ваеннапалонных у парушэнне палажэнняў Жэнеўскіх канвенцый — свядомая і мэтаскіраваная палітыка расійскай улады. Гэта робіцца спецыяльна, каб Міжнародны Чырвоны Крыж не мог зафіксаваць тое, як расійскі бок абыходзіцца з ваеннапалоннымі. Каб схаваць ад усяго свету нечалавечае стаўленне Расіі да ўкраінцаў, літаральна палітыку генацыду ўкраінскага народа», — адзначаюць у праекце.
Абмен палоннымі, у выніку якога Украіна вярнула 75 вайскоўцаў і цывільных, прайшоў 31 траўня. Генпракуратура Украіны паведамляла ў пачатку красавіка, што расследуе 27 крымінальных справаў пра забойства 54 украінскіх ваеннапалонных. Факты жорсткага абыходжання з ваеннапалоннымі, а таксама іх забойства пацвярджала ААН.
Чытайце таксама
