Укідамі, неадпаведнымі рэчаіснасці, назваў паказаны Пуціным нібыта дакумент мірнай дамовы паміж Расіяй і Украінай дарадца кіраўніка Офіса прэзідэнта Украіны Міхаіл Падаляк у інтэрв'ю Radio NV.
— Дзіўныя рэчы наступныя, на маю думку. Афіцыйна заяўляю, што, безумоўна, ніякіх лічбаў, ніякіх дамоўленасцяў з РФ не было. Мы казалі пра ход перамоваў, мы казалі, што на момант пачатку перамоваў мы настойвалі на тым, нагадаю, што Расія павінная неадкладна спыніць агонь і адысці на межы 24 лютага 2022 года.
Падаляк заявіў, што ні да якіх юрыдычных пазіцый Украіна з Расіяй не дамовіліся.
— Гэта відавочна, гэта ўсім вядома. І таму дзіўныя рэчы наступныя. 16 месяцаў вайны, і тут Пуцін, а перад гэтым Лукашэнка, выходзяць і кажуць, што быццам ёсць нейкая дамова, на якой няма ніякіх подпісаў, якая не праходзіла ні праз якія юрыдычныя працэдуры.
На думку прадстаўніка Офіса прэзідэнта Украіны, гэтымі, як сказаў Падаляк, «укідамі» Расія хоча «даціснуць» Украіну.
— Кшталту, давайце ўсё ж садзіцца за стол перамоваў, як заўгодна садзіцца, галоўнае цяпер — спыніць агонь, галоўнае цяпер — спыніць Украіну, якая мае сваё бачанне таго, як будзе фіналізаваная вайна. І давайце там зафіксуем наступнае: пэўныя тэрыторыі, пэўныя лініі размежавання, пэўныя статусы. То-бок, груба кажучы, Пуцін працягвае гаварыць, зусім не задумваючыся, пра тое, што мы хочам забраць ва Украіны не толькі тэрыторыі, але і суверэннае права гаварыць пра сваю замежную палітыку, — заявіў Падаляк, адзначыўшы, што цяпер Расія шукае любой магчымасці паўплываць на негатыўнае для яе развіццё падзей ва Украіне.
Падаляк нагадаў пра прапанаваную прэзідэнтам Зяленскім формулу міру і заявіў, што краіна не збіраецца ад яе адступаць.
— Мы не для таго 16 месяцаў ваюем, атрымалі ўсе інструменты, якія нам патрэбныя, так, не ў дастатковай колькасці, але ўсе інструменты, каб сёння сказаць, што мы пагаджаемся на «Мінск-3», — падкрэсліў ён.
Падаляк асабліва адзначыў, што ніякія перамовы сёння з Расіяй немагчымыя, прапанаваныя Афрыкай, Інданезіяй, Кітаем і іншымі міратворчыя ініцыятывы не адпавядаюць патрэбам Украіны.
— І яны дакладна не прыводзяць да фіналу вайны, яны прыводзяць да далейшай эскалацыі, — упэўнены Падаляк.
Нагадаем, на сустрэчы з афрыканскімі лідарамі Уладзімір Пуцін паказаў дакумент, які назваў праектам мірнай дамовы паміж Украінай і Расіяй. Паводле яго словаў, там стаяць подпісы кіеўскай дэлегацыі, але дамова так і не была выкананая. Раней Лукашэнка заявіў, што па гэтым дакуменце абмяркоўвалася доўгатэрміновая арэнда Крыма.