У Міністэрстве абароны Расіі заявілі пра актыўныя дзеянні падраздзяленняў Паўднёвай групоўкі войскаў на Данецкім напрамку. Ва ўкраінскім Генштабе паведамілі, што ў эпіцэнтры баявых дзеянняў застаюцца Белагораўка, Бахмут, Аўдзееўка і Мар'інка. У Інстытуце па вывучэнні вайны расказалі, як Прыгожын спрабуе павысіць свой аўтарытэт за кошт гісторыі з антываенным малюнкам, а Кадыраў занепакоены магчымымі пратэснымі настроямі ў Чачні.
Расказваем пра галоўнае са зводак штабоў і высноваў экспертаў на 400-ы дзень вайны ва Украіне.
Генштаб УСУ: адбілі больш за 60 атак праціўніка
За мінулыя суткі расійскія войскі нанеслі пяць ракетных і 25 авіяцыйных удараў, правялі 34 абстрэлы з рэактыўных сістэм залпавага агню. У выніку авіяўдару па інфраструктуры гарадоў Берыслаў Херсонскай вобласці і Дружкоўка Данецкай вобласці параненыя мясцовыя жыхары, пашкоджаныя прыватныя дамы і аб’екты цывільнай інфраструктуры, паведамляе Генштаб УСУ ў ранішняй зводцы.
— Праціўнік канцэнтруе асноўныя намаганні на вядзенні наступальных дзеянняў на Ліманскім, Бахмуцкім, Аўдзееўскім і Мар'інскім напрамках. Падраздзяленні Сіл абароны Украіны адбілі на гэтых напрамках больш за 60 атак. У эпіцэнтры баявых дзеянняў застаюцца Белагораўка, Бахмут, Аўдзееўка і Мар'інка.
— На Валынскім, Палескім, Северскім і Слабажанскім напрамках аператыўная абстаноўка без істотных зменаў, прыкмет фармавання наступальных груповак праціўніка не выяўлена. За мінулыя суткі расійскія войскі абстралялі раёны 21 населенага пункта.
— На Ліманскім напрамку цягам сутак праціўнік вёў беспаспяховыя наступальныя дзеянні ў раёнах Стальмахоўкі і Выемкі. Артылерыйскім абстрэлам падвергліся раёны 13 населеных пунктаў.
— На Бахмуцкім напрамку расійскія сілы працягваюць штурм Бахмута. УСУ тут адбілі 28 атак праціўніка. У той жа час расіяне беспаспяхова спрабавалі наступаць у раёне Арэхава-Васільеўкі, абстралялі шэсць населеных пунктаў.
— На Аўдзееўскім і Мар'інскім напрамках расійскія войскі вялі наступальныя дзеянні ў кірунку населеных пунктаў Новакалінава, Стэпавае, Аўдзееўка, Паўночнае, Першамайскае, Мар'інка Данецкай вобласці, аднак поспеху не мелі. Абстралялі 11 населеных пунктаў.
— На Шахцёрскім напрамку расійскія войскі абстралялі раёны Вуглядара, Прачыстаўкі і Вялікай Навасёлкі.
— На Запарожскім і Херсонскім напрамках расійскія сілы абараняюцца. Праціўнік абстраляў раёны больш чым 20 населеных пунктаў. Сярод іх і горад Херсон.
— Авіяцыя Сіл абароны за мінулыя суткі нанесла пяць удараў па раёнах канцэнтрацыі расійскіх войскаў.
— Падраздзяленні СПА знішчылі расійскі бамбардзіроўшчык Су-24М.
— Украінскія ракетчыкі і артылерысты нанеслі ўдары па трох раёнах канцэнтрацыі жывой сілы, узбраення і вайсковай тэхнікі праціўніка, станцыі радыёэлектроннай барацьбы, складзе боепрыпасаў і двух складах гаруча-змазачных матэрыялаў.
У Генштабе таксама заявілі, што ў анексаваным Крыме працягваюць ціснуць на грамадзян Украіны. «У прыватнасці, у Краснаперакопску работнікі ФСБ праводзяць актыўныя контрразведвальныя мерапрыемствы, суправаджаючы іх зневажальнымі працэдурамі фільтрацыі з раздзяваннем дагала, допытамі са збіццём і г. д.».
Мінабароны РФ: нанеслі паражэнне 93 артылерыйскім падраздзяленням УСУ
У Мінабароны Расіі заявілі, што ў раёне населенага пункта Таміроўка Запарожскай вобласці СПА збіла верталёт Мі-8 Паветраных сіл Украіны
— На Купянскім напрамку авіяцыя і артылерыя Заходняй групоўкі войскаў пабілі жывую сілу і тэхніку УСУ ў раёнах населеных пунктаў Гранікаўка, Сінькоўка Харкаўскай вобласці, Навасёлаўскае і Стальмахоўка Луганскай вобласці. Знішчаныя да 50 вайскоўцаў, а таксама два аўтамабілі.
— На Чырвона-Ліманскім напрамку ўдарамі авіяцыі, агнём артылерыі і цяжкіх агнямётных сістэм групоўкі войскаў «Цэнтр» пабітыя падраздзяленні УСУ ў раёнах населеных пунктаў Чырвоная Дзіброва, Неўскае Луганскай і Ямполаўка, Тарскае і Грыгораўка Данецкай абласцей. За суткі знішчаныя да 130 вайскоўцаў УСУ, дзве баявыя браніраваныя машыны, устаноўка РСЗА «Град», а таксама самаходная гаўбіца «Акацыя».
— На Данецкім напрамку ў выніку актыўных дзеянняў падраздзяленняў Паўднёвай групоўкі войскаў, удараў авіяцыі і агню артылерыі страты УСУ за суткі склалі больш за 340 вайскоўцаў і добраахвотнікаў, два танкі, чатыры баявыя машыны пяхоты, шэсць баявых браніраваных машын, дзевяць аўтамабіляў, адна ўстаноўка РСЗА «Ураган», а таксама гаўбіцы Д-20 і Д-30.
— На Паўднёва-Данецкім і Запарожскім напрамках ударамі авіяцыі, агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Уладзіміраўка, Вуглядар Данецкай вобласці, Малінаўка і Шчарбакі Запарожскай вобласці. За суткі на гэтых напрамках знішчаныя звыш 25 украінскіх вайскоўцаў і дзве баявыя браніраваныя машыны.
— На Херсонскім напрамку ў выніку агнявога паражэння знішчаныя да 25 вайскоўцаў УСУ, 11 аўтамабіляў, а таксама тры гаўбіцы Д-30.
Усяго за суткі, паводле МА РФ, нанесенае паражэнне 93 артылерыйскім падраздзяленням, жывой сіле і тэхніцы УСУ ў 107 раёнах. У раёне населенага пункта Грабеннікаўка Сумскай вобласці знішчаная самаходная агнявая ўстаноўка ўкраінскага зенітнага ракетнага комплексу «Бук-М1». У раёне населенага пункта Альгоўка Херсонскай вобласці знішчаны склад з боепрыпасамі 126-й брыгады тэрытарыяльнай абароны. Таксама ў раёне населенага пункта Залізнічнае Запарожскай вобласці знішчанае сховішча паліва 102-й брыгады тэрытарыяльнай абароны.
Перахопленая адна аператыўна-тактычная ракета «Гром-2», тры рэактыўныя снарады сістэмы залпавага агню HIMARS, знішчаныя два ўкраінскія беспілотныя лётныя апараты.
Інстытут па вывучэнні вайны: у Беларусі працягваюцца мерапрыемствы па прызыве на зборы і перападрыхтоўцы вайскоўцаў запасу
Расійскія ўлады праводзяць шырокамаштабнае расследаванне карупцыі ў Расгвардыі, гаворыцца ў свежай зводцы амерыканскага Інстытута па вывучэнні вайны. Эксперты звяртаюць увагу на дзве гучныя крымінальныя справы: арышт начальніка ваенна-марскога ведамства Расгвардыі палкоўніка Сяргея Волкава ў сувязі з продажам няякасных радыёлакацыйных сістэм па моцна завышаных цэнах і генерал-маёра Вадзіма Драгамірэцкага па абвінавачанні ў карупцыі. Як заўважаюць эксперты, малаімаверна, што карупцыя ў Расгвардыі большая, чым ва Узброеных сілах Расіі. Аднак у склад Расгвардыі ўваходзяць, у прыватнасці, элементы, якія адказваюць за ўнутраную рэжымную бяспеку Расіі. Пуцін, імаверна, надае вельмі вялікую ўвагу надзейнасці і лаяльнасці некаторых супрацоўнікаў Расгвардыі акрамя боязі карупцыі ў гэтай арганізацыі.
Уладальнік ПВК Вагнера Яўген Прыгожын скарыстаўся гісторыяй пра вынясенне прысуду бацьку з Тульскай вобласці за антываенны малюнак яго 12-гадовай дачкі, каб палепшыць свой асабісты імідж і павысіць рэпутацыю ПВК. Прэс-служба Прыгожына апублікавала ліст на імя пракурора Тульскай вобласці, у якім гаворыцца, што прысуд Аляксею Маскалёву несправядлівы. У лісце Прыгожын прапануе праверыць законнасць прысуду і рэкамендуе прыцягнуць да справы адвакатаў ПВК Вагнера для абароны Маскалёва, адзначаючы, што дзеці не павінныя трапляць у дзіцячыя дамы. Рэакцыя Прыгожына на прысуд Маскалёву асабліва іранічная, улічваючы, што ён ад пачатку быў адным з самых заўзятых і гучных прыхільнікаў закона аб пакаранні тых, хто «дыскрэдытуе» расійскія сілы, адзначаюць эксперты. Прыгожын за кошт такіх гісторый можа паспрабаваць прадэманстраваць сваю значнасць, а таксама прадставіць кіраўніцтва ПВК Вагнера як змагароў з расійскай бюракратыяй, лічаць у ISW.
Эксперты таксама адзначаюць дэманстратыўную і жорсткую рэакцыю кіраўніка Чачні Кадырава на напад на паліцэйскі ўчастак у Гудэрмесе. Кадыраў сцвярджаў, што чачэнскія ўлады забілі двух невядомых мужчын, якія спрабавалі ўчыніць тэракт у Гудэрмесе ў ноч на 28 сакавіка. Ён апублікаваў кадры, на якіх ён сам, яго 15-гадовы сын і світа чачэнскіх чыноўнікаў і сілавікоў наведваюць месца нападу і аглядаюць знявечаныя целы нападнікаў. Кадыраў, імаверна, зладзіў гэты дэманстратыўны агляд целаў, каб умацаваць свой імідж моцнага чалавека і даць чачэнцам сігнал, што любая форма ўнутранага супраціву яго кіраванню будзе ліквідаваная. Той факт, што рэакцыя Кадырава на напад была такой неадкладнай і жорсткай, сведчыць, што ён занепакоены магчымасцю ўнутранага супраціву ў Чачні, які можа падарваць яго аўтарытарнае кіраванне ў рэспубліцы. Акрамя таго, Кадыраў, хутчэй за ўсё, разглядае любыя прыкметы ўнутранай нестабільнасці ў Чачні як пагрозу захаванню ласкі Пуціна, кажуць аналітыкі.
На што яшчэ звярнулі ўвагу эксперты:
- міністр замежных справаў Ірана Хасэйн Амір Абдалахян сустрэўся з міністрам замежных справаў Расіі Сяргеем Лаўровым 29 сакавіка ў Маскве, каб абмеркаваць стратэгічныя і доўгатэрміновыя пагадненні аб супрацоўніцтве, якія, імаверна, умацуюць двухбаковыя адносіны Расіі і Ірана ў сферы бяспекі;
- міністр абароны Украіны Аляксей Рэзнікаў заявіў 27 сакавіка, што ўкраінскія сілы плануюць пачаць контрнаступленне ў красавіку або траўні ў залежнасці ад умоваў надвор’я;
- расійскія войскі правялі абмежаваныя наземныя атакі на лініі Купянск — Сватава — Крамянная;
- расійскія войскі працягвалі наступальныя дзеянні ў раёне Бахмута і на фронце Аўдзееўка — Данецк;
- генеральны дырэктар Міжнароднага агенцтва па атамнай энергіі (МАГАТЭ) Рафаэль Гросі другі раз наведаў Запарожскую атамную электрастанцыю (ЗАЭС);
- у Міністэрстве абароны Беларусі паведамілі, што працягваюцца планавыя мерапрыемствы па прызыве ваеннаабавязаных на зборы і перападрыхтоўцы вайскоўцаў запасу па ваенна-ўліковых спецыяльнасцях.