Беларус, які ўчыніў дэбош у Тайландзе, кіруе буйной камерцыйнай кампаніяй у Брэсце, захапляецца футболам і валодае парк-гатэлем, піша BGmedia.
Днямі інтэрнэт абляцела навіна, што п’яны беларус у майтках напаў на паліцэйскіх на Пхукеце. Пра гэта паведаміла газета Bangkok Post.
Мужчына, які, як мяркуецца, быў у стане алкагольнага ап’янення, учыніў дэбош у гатэлі ў раёне Каран-Біч на тайландскім турыстычным востраве Пхукет. Больш за тое, ён напаў на прыбылых на выклік гатэльнага персаналу паліцэйскіх і пасля доўгага супраціву быў дастаўлены ў паліцэйскі ўчастак, паведамляюць медыя.
На відэа, якое зняў відавочца, п’яны мужчына бегае па двары гатэля і расшкідвае паліцэйскіх і ахоўнікаў, якія спрабуюць яго затрымаць. У гэты ж час жонка і трое дзяцей спрабуюць яго супакоіць.
«Беларускаму турысту выстаўленыя абвінавачанні пасля таго, як ён, моцна п’яны, напаў на паліцыю і ахоўнікаў на Пхукеце. Яго жонка і дзеці вяртаюцца дадому без яго», — гаворыцца ў паведамленні газеты.
Выданне назвала імя затрыманага — Сяргей Асычук.
Увагу BGmedia забраў каментар карыстальніка ў адным з паблікаў у Telegram. У працэсе бурнага абмеркавання інцыдэнту на Пхукеце аўтар каментара напісаў, што дэбашыр — брастаўчанін.
Журналісты выдання паспрабавалі знайсці беларуса па імені і прозвішчы, якія назвала Bangkok Post. Аднак гэта не дало ніякіх вынікаў. У сацыяльных сетках чалавека з імем і прозвішчам Сяргей Асычук знайсці не ўдалося.
Выданне перавяло прозвішча з беларускай транскрыпцыі ў рускую. Так, замест «Асійчук» атрымалася «Осийчук». Высветлілася, што чалавек з такімі імем і прозвішчам 9 жніўня 2021 года даваў інтэрв'ю парталу football.by у якасці трэнера-гульца і капітана аматарскай футбольнай каманды «ЕўраЭкспарт» з Кобрынскага раёна. На фота — мужчына, вельмі падобны да чалавека з відэа ў Тайландзе.
У тым інтэрв'ю Асійчук расказаў, што ў яго ёсць кампанія «ЕўраЭкспарт», якая фінансуе аднайменную футбольную каманду.
«Мы займаемся экспартам і імпартам збожжавых і алейных культур, а таксама перавозкамі, лагістыкай. Ёсць грошы, якія некуды можна ўкласці, вось і скіроўваем іх на развіццё футбола», — расказаў Сяргей.
Сам мужчына прафесійна футболам ніколі не займаўся, затое ён майстар спорту па армрэстлінгу і кандыдат у майстры па паўэрліфцінгу.
Мяркуючы са знойдзенай у сеціве інфармацыі, Сяргей Асійчук — таксама гулец аматарскай каманды «Фармат», па сутнасці — яе ўладальнік і спонсар.
Акрамя гэтага, мужчына гуляе ў футбольных турнірах Брэста і вобласці за розныя аматарскія каманды. У іх ліку каманда з Даўбізна, ТАА «Аграпрадукт» і згаданы вышэй «ЕўраЭкспарт».
Больш за тое, Сяргея Асійчука апазнаў на відэа адзін з чытачоў BGmedia, які асабіста з ім знаёмы. З меркаванняў бяспекі яго звесткі ў публікацыі не раскрываюцца.
«Гэта мужык з Брэста, у яго грошай *бом (вельмі шмат. — Заўв. рэд.). Ён купіў базу „Фармат“ і туды нават клубы Вышэйшай лігі прыязджалі на перадсезонку, на міжсезонку. Там база адпачынку, некалькі палёў больш-менш нармальных. У яго BMW X7, адна з апошніх мадэляў», — пракаментавала крыніца BGmedia. Некалькі іншых чалавек інфармацыю пацвердзілі.
Журналісты выдання знайшлі звесткі пра парк-гатэль «Фармат» у Камянецкім раёне. На яго сайце цэлы раздзел прысвечаны футболу.
«Мы робім усе намаганні для актыўнага развіцця футбола. Нашая мэта — натхніць і падтрымаць запал да гэтага выдатнага віду спорту сярод нашых гасцей», — паведамляецца на сайце.
Дарэчы, на сайце спартыўнага грамадскага аб’яднання «Тэрыторыя футбола» ёсць звесткі пра дату нараджэння Асійчука — 9 снежня 1985 года.
Акурат у гэты час сям’я адпачывала ў Тайландзе. Відаць, паездка была прымеркаваная да дня нараджэння галавы сямейства.
Бізнесовец
Цяпер пра кампанію «Еўраэкспарт», якой, як мяркуецца, кіруе Асійчук. BGmedia знайшло артыкул на сайце apk-inform.com, дзе чалавек, вельмі падобны да пхукецкага дэбашыра, з бэйджыкам на грудзях расказвае пра кампанію «ЕўраЭкспарт».
Інтэрв'ю было запісанае 2 сакавіка 2019 года. У артыкуле гаворыцца, што інтэрв'ю дае дырэктар беларускай кампаніі ТАА «ЕўраЭкспарт» Сяргей Асійчук.
Паводле яго, кампанія займаецца гандлем збожжавымі і алейнымі культурамі, а таксама прадуктамі іх перапрацоўкі як на ўнутраным рынку, так і на замежным.
«Цяпер працуем з Украінай, Расіяй, ЕС і СНД. Найбліжэйшым часам плануем пастаўкі прадукцыі ў Кітай», — расказаў бізнесовец.
Паводле звестак legat.by, кампанія «ЕўраЭкспарт» была зарэгістраваная 26 красавіка 2018 года ў Камянецкім райвыканкаме. Яе юрыдычны адрас: Камянецкі раён, Расненскі сельсавет, аграгарадок Пагранічная, вул. Кастрычніцкая, 18.
Цікава, што ў расійскай крыніцы гаворыцца, што асноўны від дзейнасці ТАА «ЕўраЭкспарт» — «оптавы гандаль збожжам, неапрацаваным тытунём, насеннем і кармамі для сельскагаспадарчых жывёл».
Таксама напісана, што на 13 снежня 2024 года юрыдычная асоба дзейнічае. Выходзіць, кампанія Асійчука існуе на рынку Беларусі як мінімум шэсць гадоў.
Што будзе з бізнесоўцам з Брэста?
Грамадзянін Беларусі з Брэста «адпачываў на Пхукеце разам з жонкай і трыма няпоўнагадовымі дзецьмі і мусіў вылецець на радзіму ў сераду», піша Bangkok Post. Паводле інфармацыі выдання, сям’я затрыманага наведала яго ў паліцэйскім участку, а пазней у сераду вылецела на радзіму. Сам мужчына застаўся ў камеры часовага ўтрымання ў паліцэйскім участку на Пхукеце, каб найбліжэйшым часам паўстаць перад судом.
Паводле тайландскага заканадаўства па другім абвінавачанні яму можа пагражаць штраф у памеры да пяці тысяч даляраў і/або турэмнае зняволенне на тэрмін ад двух гадоў да пажыццёвага ў залежнасці ад цяжару траўмаў, атрыманых супрацоўнікамі паліцыі.