У Беларусі існуе дэфіцыт кадраў у школах, часцей за ўсё сярод настаўнікаў фізікі і матэматыкі. Але з гэтай праблемай збіраюцца справіцца, заявіла намесніца міністра адукацыі Беларусі Кацярына Пятруцкая, яе цытуе расійскае інфармагенцтва Sputnik Беларусь.
«Вядома, сёння ёсць шэраг вакансій у школах, і гэта факт. Але я думаю, што мы з гэтай праблемай справімся, бо вядзецца вельмі вялікая праца па падрыхтоўцы педагагічных кадраў і на ўзроўні сярэднеспецыяльнай, і на ўзроўні вышэйшай педагагічнай адукацыі для таго, каб кадравай праблемы ў нас не было», — сказала яна.
Намесніца міністра дадала, што падрыхтоўка па новых педагагічных спецыяльнасцях адкрываецца штогод «у адпаведнасці з сучаснымі запытамі грамадства і дзяржавы».
Часцей за ўсё ў школах не хапае настаўнікаў фізікі і матэматыкі, а вось у гуманітарных спецыяльнасцях недахопу спецыялістаў няма.
«Па гуманітарных спецыяльнасцях мы спраўляемся, а такія дакладныя навукі, як фізіка і матэматыка, па гэтых прадметах ёсць шэраг вакансій», — сказала Пятруцкая.
Што да зарплаты беларускіх настаўнікаў, то чыноўніца адзначыла, што яе рэгулярна павышаюць.
«Зусім нядаўна была прынятая пастанова пра павышэнне заработнай платы розным катэгорыям педагагічных работнікаў. Пытанне заработнай платы знаходзіцца ў цэнтры ўвагі, на рэгулярнай аснове ажыццяўляюцца рухі ў гэтым кірунку», — дадала яна.
Нагадаем, у пачатку жніўня кіраўнік Мінфіна Юрый Селіверстаў паведаміў, што з верасня бюджэтнікам, заробкі якіх «трошкі недацягваюць да планавых заданняў», будуць плаціць больш. Сярод такіх працаўнікоў ёсць і настаўнікі. Раней кіраўнік ведамства таксама абяцаў да 2025 года павысіць зарплаты настаўнікам да 100% ад сярэдняй па краіне.
У першым паўгоддзі заробак настаўнікаў у сярэднім складаў 2 062,5 рубля. Гэта 96,2% ад сярэдняга паказчыка. Сярэдні заробак па краіне пры гэтым быў 2 144,2 рубля.
Паводле звестак дзяржаўнай базы вакансій Беларусі на 7 жніўня, адукацыйным установам патрабавалася 899 настаўнікаў. Людзі патрэбныя на розную занятасць, ёсць нават 0,1 стаўкі, праўда, заробкі прапануюць вельмі маленькія.
Чытайце таксама