Беларуска Дар’я 5 верасня гуляла па цэнтры Варшавы на пешаходнай дарожцы і нечакана сутыкнулася з агрэсіўным мужчынам: ён злез з ровара і без прычыны ўдарыў дзяўчыну па твары. Паліцыя, якая прыбыла на месца, адпусціла яго. «Белсат» расказаў, што вядома пра развіццё гісторыі праз тыдзень.
Беларуска расказала пра здарэнне ў сваіх сацсетках, гісторыя імгненна атрымала рэзананс. Многія прапаноўвалі дапамогу, сярод іх былі нават супрацоўнікі польскай паліцыі, якія асудзілі бяздзейнасць сваіх калег.
Пасля інцыдэнту Дар’я прызнавалася, што ў шоку ад сітуацыі і адчування, што можна без прычыны збіць чалавека на вуліцы і сысці беспакараным.
«Я напалоханая, я ў поўным шоку і жаху цяпер ад таго, што мне даводзіцца адчуваць боль, і што хтосьці можа так сябе паводзіць. Ненармальныя законы», — пісала яна.
Праз тыдзень, 12 верасня, на афіцыйнай старонцы варшаўскай паліцыі з’явілася інфармацыя, што 38-гадовага мужчыну затрымалі.
«Паліцэйскіе раёна Śródmieście (цэнтр Варшавы. — Заўв. рэд.) затрымалі 38-гадовага грамадзяніна Украіны, які 5 верасня ў вечаровы час на вуліцы Пазнанскай (Poznańska) падчас сваркі ўдарыў па твары 33-гадовую жанчыну родам з Беларусі. Паліцэйскія правялі шэраг мерапрыемстваў, скіраваных на дбайнае высвятленне абставінаў здарэння і ўсіх сведак інцыдэнту. Гэтыя мерапрыемствы дазволілі выставіць мужчыну абвінавачанні па § 2 арт. 157 КК і арт. 275 КК Рэспублікі Польшча. За гэтыя дзеянні яму пагражае да 2 гадоў пазбаўлення волі», — гаворыцца ў паведамленні.
Беларуска паведаміла, што ёй ужо вядома пра затрыманне мужчыны і што сёння, 12 верасня, у яе будзе сустрэча з адвакатам.
«Яшчэ чакаю КТ галаўнога мозгу і костак твару. Цяпер у мяне праблемы з памяццю і канцэнтрацыяй, апухлыя вочы, нос і сківіцы, не кажучы ўжо пра тое, што ўнутры і якія з’яўляюцца страхі», — каментуе Дар’я.
Таксама яна кажа, што атрымала шмат падобных гісторый, таму заклікае іншых жанчын не маўчаць, калі яны сутыкаюцца з гвалтам.
Нагадаем, гэта не першы выпадак, калі на беларусак нападаюць проста на вуліцы ў сталіцы Польшчы. Так, у канцы чэрвеня ў Варшаве на нашую суайчынніцу напалі трое палякаў. Паводле яе, яны вырвалі тэлефон з рук, адзін з іх ударыў яе і паспрабаваў душыць. Яе выратаваў адзін з аўтамабілістаў, хоць, як кажа дзяўчына, многія праязджалі міма і не рэагавалі.
Яшчэ адну дзяўчыну ноччу ў ліпені незнаёмы мужчына спрабаваў пацалаваць і задраць вопратку, але яна змагла адбіцца.
У лютым 25-гадовая беларуска Ліза была згвалтаваная ў цэнтры Варшавы, праз некалькі дзён яна памерла ў бальніцы, не прыходзячы ў прытомнасць. Абвінавачаны — 23-гадовы жыхар польскай сталіцы Дарыян С., якога затрымалі неўзабаве пасля таго, што здарылася.