Яшчэ 29 чэрвеня Еўрапейскі саюз распаўсюдзіў на Беларусь санкцыі, якія раней уводзіў у дачыненні да Расіі. У спісе забароненых да вывазу з ЕС у Беларусь тавараў — сотні найменняў, сярод якіх розныя запчасткі, тэхніка, жаночае адзенне, прадметы гігіены і нават абутак. Ужо ў чацвер, 4 ліпеня, беларусы, якія едуць з Польшчы дадому і вязуць розныя тавары, сутыкнуліся з праблемамі. Як расказваюць у розных чатах па перасячэнні мяжы, многіх проста разварочваюць і не даюць вывозіць тэхніку і іншыя тавары з Польшчы. Паглядзелі, што пішуць беларусы пра тое, што адбываецца.
Якія тавары забаранілі?
Поўны спіс забароненых тавараў налічвае сотні найменняў і ўключае некаторыя морапрадукты (ракападобных і ікру), хімічныя рэчывы, сродкі гігіены (пену для галення, мыла, дэзадаранты, парфумерыю і гэтак далей), будаўнічыя матэрыялы, туалетную паперу, жаночую вопратку і любы абутак з «падэшвай з гумы, пластмасы, скуры», каштоўныя камяні і гэтак далей. Таксама цяпер забаронена вывозіць розную тэхніку: рухавікі і маторы, помпы, лядоўні, пасудамыйкі і гэтак далей.
Праблемы з чаргой на мяжы пачаліся з самай раніцы. Так, у чатыры гадзіны ў чаце «АВТО „Брест — Тересполь“» ужо пісалі: «Чарга РП — РБ велізарная. Не спрабуйце аб’ехаць і ўклініцца».
Каля 11 раніцы пачалі расказваць пра тое, што людзей разварочваюць і не выпускаюць у Беларусь.
— Правяраюць кожную машыну, [цяпер] беставарны выезд, новая змена сказала. Назад у РП разварочваюць усіх. Там спіс на 200+ лістоў, толькі некалькі найменняў прахадных. Блытаніна поўная, — адзначыў адзін з карыстальнікаў.
Спачатку ў чаце казалі, што мытнікі не прапускаюць тавары, на якія аформленае вяртанне VAT (падатку на дабаўленую вартасць). Але неўзабаве з’явілася інфармацыя, што забарона датычыць любой тэхнікі, запчастак.
— Зялёным [калідорам] паралельна мне праязджалі машыны з таварам. Прыязджаеш на «ватавы канал», мытня правярае, што вязеш, і вяртае назад у Польшчу. Ужо хвілін 15−20 зялёным ніхто не едзе, складана сказаць, ці будуць далей з таварам прапускаць. Я на разварот, — піша Аляксандр. — Мытня кажа, што нічога нельга. З іх словаў, мытня павінная адбіць VAT, адправіць на кантроль і выклікаць паліцыю. І тыпу яны робяць добрую справу, што проста вяртаюць — без паліцыі і штрафу.
На прадукты забарона не распаўсюджваецца, адзначаюць у чаце «Граница Польша».
— Гэта Літва забараніла ўвоз усіх запячатаных прадуктаў. Адкрытыя прадукты харчавання, якія вам неабходныя ў дарозе, пакідаюць, — тлумачыць Святлана. — Менавіта каб былі адкрытыя.
Багаж тых, хто едзе на аўтобусах, так старанна не правяраюць. Паводле беларусаў, якія перасякаюць мяжу, сумкі і валізкі правяраюць выбарачна: у кагосьці глядзелі змесціва праз сканер, а хтосьці нават не даставаў багаж.
Афіцыйна польскі бок пакуль не каментаваў сітуацыю на мяжы. «Люстэрка» папрасіла пра каментар Польскую мытную службу. Мы апублікуем яго, як толькі атрымаем.
Чытайце таксама
