У Ізраілі жывуць тысячы беларусаў, якія маюць як ізраільскае, так і беларускае грамадзянства. Пасольства Беларусі ў Ізраілі збірала інфармацыю пра сваіх грамадзян, але эвакуацыйных рэйсаў для ахвочых вылецець у Беларусь пакуль не было. «Радыё Свабода» пагутарыла з некаторымі беларусамі пра тое, як выбрацца з Ізраілю самастойна.
19 кастрычніка кіраўнік МЗС Беларусі Сяргей Алейнік назваў сытуацыю з беларускімі грамадзянамі ў зоне канфлікту «даволі няпростай». Ён заявіў, што Беларусь атрымала дазвол на гуманітарны рэйс кампаніі «Белавія» ў Ізраіль. Але выканаць гэта будзе «няпроста».
— На сённяшні дзень застаецца адна перашкода — гэта санкцыі ЗША ў адносінах нашага нацыянальнага авіяперавозчыка, — заявіў Алейнік.
Нікому з суразмоўцаў «Радыё Свабода» беларускае пасольства не дапамагала выехаць пасля пачатку вайны ў Ізраілі. Цяпер людзі дабіраюцца адтуль у Беларусь праз Грузію, Кіпр, Расію, Турцыю, Аб’яднаныя Арабскія Эміраты. Цэны на квіткі вагаюцца ад 300 да 1200 еўра.
«Самы просты і танны шлях — праз Грузію»
У адмысловых суполках у сацыяльных сетках беларусы дзеляцца сваім досведам вылету з Ізраілю. Пішуць, што цэны на дарогу пасья пачатку вайны выраслі прыкладна ў два разы. Некаторыя авіякампаніі адмянілі палёты ў Ізраіль на некалькі тыдняў.
Некаторыя беларусы выбіраюць шлях праз Кіпр і Польшчу. Адтуль — аўтобусам да Мінску. На наступную нядзелю, 22 кастрычніка, квіткі на рэйс Тэль-Авіў — Ларнака (Кіпр) каштуюць 130−145 долараў, з Ларнакі ў Варшаву — 190 долараў, аўтобус з Варшавы да Мінску — 30 долараў.
Вылятаюць у Мінск і праз Аб’яднаныя Арабскія Эміраты. Гэта каштуе каля тысячы эўра. Білеты з Тэль-Авіва да Дубая на 22 кастрычніка ў ізраільскай авіякампаніі «Эль-Аль» — па 300−400 долараў, з Дубая да Мінску — 400−600 долараў.
Беларус Максім (імя змененае дзеля бяспекі суразмоўцы) расказаў, што да яго ў Ізраіль прыязджала сваячка з Беларусі. Яна планавала вярнуцца дахаты ў Мінск самалётам праз Баку, азербайджанскімі авіялініямі. Але некалькі дзён таму рэйс адмянілі. Таму цяпер беларуска паляціць праз Тбілісі. Туды квіток каштаваў каля 160 долараў. На рэйсы Тбілісі — Мінск кампаніі «Белавія» трэба выдаткаваць каля 360 даляраў. Усяго 520 долараў за дарогу.
— Можна было ляцець хоць сёння праз Маскву, самалёты і квіткі ёсць. Але з Тэль-Авіва да Масквы квіток каштаваў 870 долараў. Гэта ізраільскай кампаніі «Эль-Аль», — патлумачыў суразмоўца.
Ён дадаў, што ад пачатку вайны сваячка тэлефанавала па дапамогу ў пасольства, ды лінія была заўсёды занятая.
На 22 кастрычніка самыя танныя білеты з Тэль-Авіва да Масквы каштуюць 960 долараў.
Іншы беларус Антон (імя змененае) патлумачыў, што пасольства тэлефанавала тым беларусам, якія стаяць на ўліку.
— Проста яны збіралі інфармацыю, і ўсё. Сам я туды не званіў. Вывучыў рэйсы і прыйшоў да высновы, што самы лёгкі і танны шлях — праз Грузію, — кажа Антон.
Ён дадаў, што ізраільскія ўлады не рэкамендуюць сваім грамадзянам лятаць у Турцыю ці праз яе.
Беларуска Ірына, якая вырашыла ляцець на радзіму 14 кастрычніка, аддала за дарогу дадому 1200 еўра.
— Ляцела праз Стамбул. Потым Варшава і аўтобус да Брэста. Уся дарога — 1200 еўра, — патлумачыла яна.
Іншая ўраджэнка Беларусі напісала, што яна звязалася з «каналам, які займаецца эвакуацыяй беларусаў», і ёй там адмовілі, бо яна мае пашпарт Ізраілю.
Яна дадала, што значна выраслі цэны на рэйсы ў Маскву.
— Расійскія авіялініі на бліжэйшыя дні — 3600 долараў на бабулю і дваіх унукаў, — патлумачыла яна.
Што з беларусамі ў сектары Газа
Консул Беларусі ў Ізраілі Станіслаў Венцаль яшчэ 10 кастрычніка казаў, што «дасягнутая дамоўленасць з расійскім бокам аб эвакуацыі дзясяткаў беларусаў з сектару Газа». Але на гэты момант нічога не вядома пра эвакуацыю. Расійскія СМІ пішуць, што яна дагэтуль не адбылася. Меркавалася эвакуаваць расіян праз Егіпет.
— Там сытуацыя няпростая. Непасрэднае прыбыццё на гэтую тэрыторыю немагчымае. Сытуацыю ўскладняюць перабоі з інтэрнетам і сувяззю, — казаў Станіслаў Венцаль.
