Асобу падазраванага ў падрыве расійскага разведвальнага самалёта А-50У Мікалая Швяца высветлілі ў дзень дыверсіі — 26 лютага. Пра гэта паведаміў у эфіры дзяржтэлеканала «Беларусь 1» аператыўны супрацоўнік КДБ.
Заданне на падрыў расійскага борта Швец з пазыўным Гаспар атрымаў ад куратара са Службы бяспекі Украіны ў снежні мінулага года, паведамілі ў эфіры дзяржтэлеканала.
15 студзеня ён выехаў з Кіева ў Варшаву. Адтуль ён спрабаваў на аўтобусе заехаць у Беларусь, але беларускі памежнік яго ў краіну не пусціў. Швец вярнуўся ў Польшчу, адтуль дабраўся да Рыгі, а затым перамясціўся ў расійскі Пскоў. На рэйсавым аўтобусе Швец даехаў да Мінска. Жыллё яму дапамог зняць беларус Віталь Якуцік, які пражывае ў Польшчы, паведамілі ў эфіры «Беларусь 1».
У Мінску Швец «пачаў падрыхтоўку да тэракту». Выбухоўку, дроны і пульты кіравання ён забраў з тайніка пад Мінскам. Абсталяванне, паводле звестак дзяржтэлеканала, у нашую краіну пераправіў той жа Віталь Якуцік.
Каардынаты і тэкставае апісанне «схрону» Швяцу даслаў па тэлефоне «куратар» з Кіева.
— Я замовіў таксі і паехаў у найбліжэйшы ад гэтага пункту пасёлак. Адтуль я пайшоў пешшу некалькі кіламетраў, знайшоў схрон, пагрузіў у заплечнік і паехаў назад у кватэру, — сказаў на допыце Швец.
Сабраць дроны яму дапамаглі па відэасувязі «куратары». 19 лютага Швец паспрабаваў першы раз запусціць дрон, але лётны апарат рэагаваў на каманды з затрымкай. Сігнал губляўся — падляцець было нельга.
— Патрэбны быў рэтранслятар для ўзмацнення сігналу. Яго (рэтранслятар. — Заўв. рэд.) даставіў чарговы памагаты — Міхаіл Дзёмін, грамадзянін Беларусі, які вельмі часта бывае ва Украіне. Астатняе Швец купіў у будаўнічым гіпермаркеце Мінска, — сказалі ў эфіры «Беларусь 1».
Пасылку з рэтранслятарам Швец атрымаў праз пяць дзён. Ён яго сабраў і раніцай 26 лютага прыехаў на машыне ў раён Мачулішчаў. Пешшу праз лес ён падышоў максімальна блізка да аэрадрома і «пасадзіў два дроны на фюзеляж самалёта А-50У».
— Бліжэй да 10 гадзін раніцы на стаянцы аэрадрома ў Мачулішчах прагрымелі два выбухі, — паведамілі ў эфіры дзяржтэлеканала.
Швец паспеў загрузіць відэа падлёту дронаў у воблачнае сховішча.
— Аднак стан яго псіхікі быў на мяжы. Ён вельмі спяшаўся. Упаў. Згубіў заплечнік з абсталяваннем, — падкрэслілі на «Беларусь 1».
Неназваны супрацоўнік КДБ расказаў, што асобу Швяца высветлілі ў дзень дыверсіі, і пачаўся яго вышук. «Дыверсанта» спрабавалі вывезці ва Украіну праз Столін, але эвакуацыя не ўдалася праз тое, што беларускія сілавікі блакавалі межы.
— Пасля таго як украінская спецслужба зразумела, што варыянт эвакуацыі Швяца на іх тэрыторыю праз Столін не атрымалася ў выніку прынятых неадкладных мер па блакаванні дзяржаўнай мяжы, быў рэалізаваны экстранны сцэнар па вывадзе яго ў прыгарад Мінска, — расказаў аператыўны супрацоўнік КДБ.
Швяца вывезлі ў садовае таварыства «Бярозавы гай — 1», дзе ён хаваўся ў прыватным доме. Транспартаваннем падазраванага займаўся беларус Лапацін — сябар доктара-псіхатэрапеўта Кацярыны Тачыцкай, якая выехала з Беларусі і якую звязваюць з дыверсіяй у Мачулішчах.
На «явачнай кватэры» Швяца і затрымалі 4 сакавіка сілавікі. КДБ распачаў крымінальную справу па факце «спробы здзяйснення акту тэрарызму» ў Мачулішчах. Затрыманыя больш за 20 чалавек.
Нагадаем, улады Беларусі ўнеслі спецыяльныя папраўкі ў крымінальнае заканадаўства. Цяпер найвышэйшая мера пакарання можа пагражаць не толькі за акт тэрарызму, але нават за замах на здзяйсненне акту тэрарызму або падрыхтоўку да яго.
