У Мінску 1 сакавіка затрымалі каля 80 удзельнікаў «ПВК Родан», з іх 65 — няпоўнагадовыя. Такую лічбу агучыў міністр унутраных справаў Іван Кубракоў на прэс-канферэнцыі.
Паводле кіраўніка ведамства, затрыманыя «каардынавалі групы моладзі». Іх прыцягнулі да адміністрацыйнай адказнасці.
— У нашай краіне ўсё (рух «ПВК Родан». — Заўв. рэд.) пачалося 22 лютага. Раней мы адсочвалі развіццё гэтага руху ў Расіі і Украіне. І калі ў Гомелі рыса была перасечаная, затрымалі ў першую чаргу адміністратараў гэтай суполкі. Нашая задача — не даць зламаць лёс нашых дзяцей! Для гэтага працуем на апярэджанне разам з педагогамі, — сказаў Кубракоў.
Нагадаем, пра затрыманні падлеткаў з руху «ПВК Родан», які прапагандуе гвалт і правакуе масавыя бойкі, спачатку паведамлялі ў Расіі, потым — ва Украіне.
Неўзабаве субкультура з’явілася і ў Беларусі: найбольш масавыя затрыманні маладых людзей — каля 200 чалавек — прайшлі 28 лютага ў ГЦ «Сакрэт» у Гомелі. Следчы камітэт заявіў пра завядзенне крымінальнай справы за «арганізацыю і падрыхтоўку дзеянняў, якія груба парушаюць грамадскі парадак».
1 сакавіка 52 удзельнікі планаванай сустрэчы «ПВК Родан» (у тым ліку 41 падлетак) былі затрыманыя ў Брэсце. У Мінску таксама прызначылі сходку ўдзельнікаў «ПВК Родан», але несанкцыянаванае мерапрыемства так і не адбылося: сілавікі прыйшлі туды загадзя і не далі падлеткам сабрацца ў групу. Паводле звестак Tochka.by, затрымалі некалькі чалавек. Былі затрыманні і ў Оршы.