Мікалай Швец, які, мяркуючы з растыражаваных арыенціровак, можа мець дачыненне да «асабліва цяжкага злачынства», што адбылося 26 лютага на вайсковым аэрадроме ў Мачулішчах, у названыя дні быў дома ва Украіне і нікуды не выязджаў. Пра гэта паведаміла «Нашай Ніве» яго сястра.
Суразмоўніца выдання папрасіла не публікаваць яе імя і фота. Яна прызнала, што на апублікаваных у СМІ арыенціроўках — яе родны брат:
«Ну проста зорка! Я баюся даваць яго кантакт, бо гэта можа быць для яго небяспечна пры ўсёй сур’ёзнасці справы, але ён дакладна не мае дачынення да гэтай акцыі. Ён ніколі не быў у Беларусі. 25 і 26 лютага ён дома сядзеў ва Украіне: мужчынам жа нельга выязджаць».
Яна расказала, што іх сям’я родам не з Крыма, а з Крывога Рога, хоць і жыла ў Вялікай Ялце да расійскай акупацыі. Потым Швяцы з’ехалі з паўвострава.
«Брат зусім не вайсковец. У самым пачатку вайны Мікалай запісаўся ў тэрабарону, але цяпер ён не там, бо людзей хапае і без яго, набору няма. Наогул пастаяннай прафесіі брат не мае і працуе дзе давядзецца. І ён не спецслужбіст», — сказала дзяўчына.
Сястра «падазраванага» лічыць, што фота Мікалая, размешчаныя на арыенціроўках, былі «злітыя» з базы ПрыватБанка:
«Мне як жыхарцы Украіны заўважна, што гэта фота, якія рабілі ў банку падчас выдачы карткі. Ва Украіне гэта звычайная справа, што фота кліентаў банкаў прадаюць у інтэрнэце. Я асабіста лічу, што гэта „ўкід“ з нейкага боку. Гэтага не мог здзейсніць мой брат».
Нагадаем, раніцай 26 лютага ў ваколіцах вайсковага аэрадрома ў Мачулішчах мясцовыя жыхары чулі два выбухі. У BYPOL паведамілі, што былі пашкоджаныя расійскі ваенна-транспартны самалёт і снегаўборачная тэхніка. У мясцовых чатах пасёлка Мачулішчы пісалі пра вялікую колькасць вайскоўцаў «з аўтаматчыкамі», праверкі машын, абыходы супрацоўнікамі АМАП мясцовых жыхароў.
Як заявіў кіраўнік BYPOL Аляксандр Азараў, выбухі — вынік дыверсіі беларускіх партызан: яны скінулі выбуховыя прылады на расійскі самалёт далёкага радыёлакацыйнага выяўлення (ДРЛВ) А-50, які знаходзіўся на вайсковым аэрадроме ў Мачулішчах. Паводле Азарава, самалёт выведзены з ладу. У Мінабароны сітуацыю афіцыйна не каментавалі. У МНС сказалі, што інфармацыі пра выбухі не паступала. Улады дагэтуль ніяк не пракаментавалі надзвычайнае здарэнне.
Пры гэтым 27 лютага Аляксандр Лукашэнка сабраў нараду з вузкім колам сілавікоў. У свой кабінет ён запрасіў дзяржсакратара Савета бяспекі, міністраў унутраных справаў і абароны, старшыняў КДБ і Дзяржпамежкамітэта.
Пазней у СМІ з’явіліся арыенціроўкі пра вышук Мікалая Швяца за «здзяйсненне асабліва небяспечнага злачынства» ў Мачулішчах. На пытанне «Люстэрка», ці звязаны гэты мужчына з дыверсіяй, кіраўнік BYPOL Аляксандр Азараў адказаў адмоўна.
— Нам гэты твар незнаёмы. Хто ён такі, я не ведаю. У іх задача — выяўляць падазраваных. Але бог яго ведае, як яго выявілі , — яны ж не расказваюць. Выпадкова праходзіў па вуліцы, і вось яны яго падазраюць, — пракаментаваў экс-сілавік.
