Дапоўненыя пералікі тавараў, забароненых да ўвозу і рэалізацыі на тэрыторыі Беларусі, паведамілі ў прэс-службе ўрада. Цяпер з «недружалюбных» краін нельга ўвозіць, напрыклад, паперу і рыззё, а канкрэтна з Польшчы, Чэхіі, Літвы, Латвіі і Эстоніі — шпалеры і валізкі.
Новая пастанова была падпісаная прэм’ер-міністрам Раманам Галоўчанкам. Згодна з дакументам, «пералік тавараў, забароненых да ўвозу і рэалізацыі на тэрыторыі Рэспублікі Беларусь, якія паходзяць з недружалюбных краін», дапаўняецца наступнымі пазіцыямі:
- поліэтылен высокага ціску;
- шынная прадукцыя;
- пліты OSB;
- фанера;
- вырабы сталярныя і цяслярскія;
- папера і вырабы санітарна-гігіенічныя;
- папера і кардон, уключаючы гафраваныя;
- рыззё;
- шкловалакно, уключаючы шклавату.
А ў спіс тавараў канкрэтна з Польшчы, Чэхіі, Літвы, Латвіі і Эстоніі, забароненых да ўвозу і продажу ў Беларусі, уключаныя:
- торбы і валізкі;
- шпалеры;
- плітка керамічная;
- санітарна-тэхнічныя вырабы;
- лядоўні;
- маразільнікі і іншае ахалоджвальнае або маразільнае абсталяванне;
- пральныя машыны;
- падгузнікі і пялюшкі.
«Падпісаная пастанова — мера ў адказ на прынятыя Еўрапейскім саюзам рашэнні пра пашырэнне з 1 ліпеня 2024 года санкцый у дачыненні да Рэспублікі Беларусь», — гаворыцца ў тлумачэнні.
Гэтыя меры ўступяць у сілу з 15 кастрычніка 2024 года.
Нагадаем, у жніўні ўжо быў дапоўнены пералік тавараў з «недружалюбных» краін, забароненых да ўвозу і рэалізацыі на тэрыторыі Беларусі. Тады ў чорны спіс дадалі маргарын, макарону, цэмент і вырабы з яго, азотныя ўгнаенні, пластмасавы посуд, пліты ДСП і МДФ, скрыні, скрынкі, мяшкі, пакеты і іншую ўпаковачную тару з паперы і кардону, а таксама будаўнічую цэглу.
Ранейшыя меры таксама былі адказам на пашырэнне санкцый. Як паведамлялася, 29 чэрвеня Рада ЕС распаўсюдзіла на Беларусь санкцыі, якія раней увялі супраць Расіі. Новыя абмежаванні скіраваныя на гандаль, паслугі, транспарт і перадухіленне абыходу наяўных санкцый. Гэта ўключае забарону на імпарт з Беларусі золата, алмазаў, гелію, вугалю, сырой нафты.