Прэзідэнт Расіі Уладзімір Пуцін 23−24 траўня будзе знаходзіцца ў Беларусі з двухдзённым афіцыйным візітам, Аляксандр Лукашэнка ў пятніцу правядзе з ім перамовы, паведамляе прэс-служба беларускага палітыка.
Перамовы Лукашэнкі і Пуціна пройдуць 24 траўня ў Палацы Незалежнасці спачатку ў вузкім, а потым у пашыраным складзе.
Яны абмяркуюць «стан і перспектывы развіцця ўсяго комплексу беларуска-расійскіх адносін», у тым ліку інтэграцыйны парадак дня і рэалізацыю рашэнняў, прынятых Найвышэйшым дзяржсаветам Саюзнай дзяржавы, а таксама палітычны дыялог, прасоўванне сумесных гандлёва-эканамічных і кааперацыйных праектаў, умацаванне бяспекі і ўзаемадзеянне ў гуманітарнай сферы.
«У цэнтры ўвагі традыцыйна будуць таксама міжнародны парадак дня, становішча ў рэгіёне, сумеснае рэагаванне на выклікі і пагрозы», — паведамляе прэс-служба Лукашэнкі.
Спікер Крамля Дзмітрый Пяскоў паведаміў, што кантакты Лукашэнкі і Пуціна ў Мінску запланаваныя як у чацвер вечарам, так і ў пятніцу.
«І сёння будуць шырокія зносіны двух прэзідэнтаў, запланаваныя і таксама заўтра, будзе цэлы дзень гэтага афіцыйнага візіту», — цытуе Пяскова РІА «Новости».
Гэты візіт Пуціна ў Мінск не анансаваўся загадзя.
Нагадаем, папярэднім разам Аляксандр Лукашэнка і Уладзімір Пуцін вялі перамовы ў Маскве ў пачатку красавіка, беларускі палітык таксама прыязджаў у
РФ з неанансаваным візітам. Сустрэча праходзіла за зачыненымі дзвярыма ў фармаце «сам-насам».
Тады Лукашэнка расказаў Пуціну, што на межах Беларусі з краінамі ЕС «цяжкая сітуацыя», і паскардзіўся на закрыццё пунктаў пропуску.