Без каментароў пакінуў пытанне пра тое, ці сапраўды працэс перамяшчэння нестратэгічнай ядзернай зброі з Расіі на тэрыторыю Беларусі ўжо пачаўся, прэс-сакратар прэзідэнта РФ Дзмітрый Пяскоў, піша ТАСС.
Пяскова папрасілі пракаментаваць нядаўнюю заяву Аляксандра Лукашэнкі пра пачатак перамяшчэння ў Беларусь расійскай нестратэгічнай ядзернай зброі. Даць прамы адказ прэс-сакратар прэзідэнта Расіі Уладзіміра Пуціна не змог.
Замест гэтага ён расказаў, што Беларусь «сутыкаецца з вельмі недружалюбнымі, калі не сказаць больш — варожымі — праявамі з боку суседніх для яе дзяржаваў».
— Гэта ўсё патрабуе ад нас далейшага развіцця нашых саюзніцкіх адносін, умацавання гэтых адносін, якія распаўсюджваюцца на розныя сферы, у тым ліку і далейшае развіццё адносін у вайсковым плане. Што мы і робім, — сказаў ён.
На ўдакладняльнае пытанне пра тое, ці сапраўды працэс перамяшчэння нестратэгічнай ядзернай зброі з Расіі на тэрыторыю Беларусі ўжо пачаўся, ён адказаў, што «сказаў тое, што сказаў на гэтую тэму».
Нагадаем, 25 траўня на форуме Еўразійскага эканамічнага саюза Аляксандр Лукашэнка заявіў, што перамяшчэнне нестратэгічнай ядзернай зброі з Расіі на тэрыторыю Беларусі ўжо пачалося.
«Ён (прэзідэнт РФ Уладзімір Пуцін. — Заўв. рэд.) мяне праінфармаваў, што сёння ён падпісаў указ пра нашыя дзеянні па размяшчэнні ядзернай зброі ў Беларусь. Гаворка ішла пра канкрэтны дакумент. Было прынятае рашэнне ў развіццё таго, што было сказана вусна. Нам трэба было падрыхтаваць месцы захоўвання і іншае. Мы гэта зрабілі, таму ўжо пачалося перамяшчэнне ядзерных боепрыпасаў», — сказаў Лукашэнка.
На пытанне пра тое, ці знаходзіцца нестратэгічная ядзерная зброя ў Беларусі, Лукашэнка адказаў: «Магчыма».
Чытайце таксама
