У офісе расійскага маркетплэйса Wildberries у Маскве адбылася страляніна. У яго прэс-службе паведамілі, што туды спрабаваў трапіць муж заснавальніцы кампаніі. У выніку інцыдэнту ёсць загінулы і некалькі параненых, сярод іх — паліцэйскія, пішуць расійскія СМІ і тэлеграм-каналы.
Уладзіслаў Бакальчук, муж заснавальніцы Wildberries Таццяны Бакальчук, 18 верасня паспрабаваў «незаконна» трапіць у офіс кампаніі ў маскоўскім бізнес-цэнтры «Романов Двор», заявілі РБК у прэс-службе маркетплэйса.
Тым часам тэлеграм-канал Mash паведаміў, што невядомыя ўчынілі страляніну ў офісе пасля таго, як іх адмовіліся пускаць. Пазней стала вядома, што ў выніку інцыдэнту загінуў адзін чалавек і двое параненыя. Некалькі чалавек затрыманыя. Сярод пацярпелых ёсць паліцэйскія.
Карэспандэнт MSK1.ru паведаміў, што з будынка факультэта журналістыкі МДУ па суседстве з маскоўскім офісам Wildberries эвакуявалі студэнтаў. У прэс-службе ВНУ гэтую інфармацыю адмаўляюць.
«Праваахоўнымі органамі прынятыя неабходныя меры, сітуацыя стабільная», — заявілі ў Wildberries.
«Сябры, на мяне і на маю каманду спрабавалі здзейсніць напад, калі мы прыехалі на перамовы па прыпыненні будаўніцтва складоў у офіс на Раманаў завулак. Са мной усё добра, разбіраемся. Чакайце падрабязнасцяў», — расказаў у сваім тэлеграм-канале сам Уладзіслаў Бакальчук.
Праз паўгадзіны ўжо ў сваім тэлеграм-канале адрэагавала яго жонка Таццяна Бакальчук: «Сёння група людзей пад кіраўніцтвам Уладзіслава Бакальчука, Сяргея Ануфрыева і Уладзіміра Бакіна паспрабавала захапіць офісы Wildberries у Маскве. <…> Заява пра нібыта перамовы, на якія прыехала ўзброеная група, гучыць абсурдна, бо ніхто ні пра якія перамовы не дамаўляўся.
Я публічна звяртаюся да праваахоўных органаў узяць на кантроль гэтую сітуацыю. У нас няма сакрэтаў. Таму прашу зрабіць публічнымі вынікі расследавання наконт матываў дзеянняў людзей, якія арганізавалі гэтую анархію. Вось цяпер гэта рэйдарскі захоп. Дакладней, яго няўдалая спроба», — лічыць прадпрымальніца.
Як піша «Агентство», у перастрэлцы ля офіса Wildberries за 350 метраў ад Крамля пацярпелі як мінімум тры байцы MMA з Каўказа — Абубакар Местоеў, Рашыд Кодзеў і Умар Чычаеў. Чычаеў жыве ў Чачні, быў сябрам байцоўскага клуба Рамзана Кадырава «Ахмат» і нават фатаграфаваўся разам з кіраўніком Чачні. Ён таксама служыў у Расгвардыі ў Чачні.
Местоеў і Кодзеў — таксама выхадцы з каўказскіх рэспублік. Кодзеў — з Інгушэціі, а Местоеў — з Паўночнай Асеціі.
Нагадаем, 30 ліпеня стала вядома, што дырэктарка Wildberries Таццяна Бакальчук падала заяву на развод са сваім мужам Уладзіславам. Развод адбываецца на фоне скандалу вакол кампаніі: муж уладальніцы 99% акцый Уладзіслаў Бакальчук скардзіўся кіраўніку Чачні (РФ) Рамзану Кадыраву на тое, што жонка нібыта «сышла з дому і звязалася з незразумелай кампаніяй», якая «выводзіць актывы». Кадыраў у сябе ў сацсетках назваў тое, што адбываецца, «рэйдарскім захопам» і паабяцаў «вярнуць у сям’ю» і Таццяну, і бізнес.