У Мінску знайшлі рэшткі пенсіянера, які загінуў 15 гадоў таму: пасля сваркі яго расчляніў і закапаў былы зяць, а потым атрымліваў пенсію мужчыны па яго пашпарце, расказалі ў МУС.
Супрацоўнікі сталічнага крымінальнага вышуку раскрылі серыю злачынстваў, учыненых у дачыненні да пажылога мінчука.
Летась міліцыянты затрымалі былога мужа яго дачкі, які некалькі гадоў хадзіў на пошту і незаконна атрымліваў замест мужчыны пенсію па яго пашпарце. Тады суд прызнаў фігуранта вінаватым у махлярстве і прызначыў пакаранне ў выглядзе пазбаўлення волі.
Між тым высветліць, дзе знаходзіцца законны ўладальнік пашпарта, не ўдалося. Сам пенсіянер на сувязь з міліцыяй не выходзіў, а зносіны са сваякамі спыніў не менш за дзесяць гадоў таму. Блізкія не заяўлялі пра яго знікненне, тлумачачы гэта тым, што мужчына 1930 года нараджэння і раней надоўга сыходзіў з дому.
Тым не менш па факце невядомага знікнення мінчука завялі крымінальную справу і пачалі пошукі. У працэсе апыталі былога зяця зніклага, які прызнаўся: пенсіянер загінуў каля 15 гадоў таму ў мінскай кватэры ў выніку сваркі, якая здарылася паміж імі. Замятаючы сляды, фігурант расчляніў цела на шэсць частак і закапаў у парку недалёка ад дома.
Там зладзілі раскопкі з тэхнікай, прыцягнулі кінолага ГУУС са службовым сабакам. У канцы ліпеня былі знойдзеныя рэшткі ахвяры, іх скіравалі на экспертызу.
56-гадовы былы зяць загінулага прызнаў сваю віну.