Суд Ляхавіцкага раёна 28 студзеня мусіў судзіць за анлайн-пікетаванне завуча мясцовай гімназіі Таццяну Крапіневіч. Аднак яна пакінула Беларусь, паведаміў кіраўнік BYSOL Андрэй Стрыжак.
«Завуч гімназіі з Ляхавіч была вымушаная пакінуць краіну з-за прэсінга, які ёй зладзіла стукачка Бондарава. BYSOL эвакуіраваў Таццяну літаральна за некалькі дзён да прызначанага суда. Таццяна пачынае жыццё з нуля ў бяспечнай краіне і просіць вас пра дапамогу», — напісаў Стрыжак.
Жанчыну чакаў суд за «парушэнне парадку арганізацыі ці правядзення масавых мерапрыемстваў».
Нагадаем, Крапіневіч — настаўніца матэматыкі і завуч па метадычнай рабоце гімназіі ў Ляхавічах. Як педагог жанчына стала пераможцай абласнога этапу рэспубліканскага конкурсу «Настаўнік года Беларусі» ў 2023 годзе.
У тым самым годзе дзяржаўнае інфармагенцтва БЕЛТА апублікавала з ёю інтэрв'ю. Таццяна расказала, што пасля двух дзясяткаў гадоў працы ў бізнесе яна пераехала з Мінска ў Ляхавічы, каб вучыць дзяцей. Гэты матэрыял перапосціў і тэлеграм-канал Міністэрства адукацыі.
У снежні мінулага года пра Таццяну Крапіневіч напісала праўладная і прарасійская прапагандыстка Вольга Бондарава. Яна заявіла, што выкладчыца вучылася «на дзярждэпаўскіх курсах кіравання свядомасцю масаў і выступлення супраць дзяржаўнага ладу ў 2020 годзе». У якасці «доказу» даносчыца прымацавала скрыншот абвесткі пра набор дзяцей у адукацыйны лагер, які, паводле сцверджання Бондаравай, быў размешчаны ў Instagram-акаўнце Таццяны, але пазней быў выдалены.
«Думае (Таццяна. — Заўв. рэд.), напэўна, што міліцыя „не знойдзе доказаў“. Міліцыя, можа, і не знойдзе, а вось ГУБАЗ дакладна дакапаецца. Асабліва калі ёсць падставы ў выглядзе звароту са скрынамі і спасылкамі», — напісала прапагандыстка ў сваім тэлеграм-канале.
Агулам за восем дзён снежня Бондарава прысвяціла завучу ляхавіцкай гімназіі пяць публікацый, у кожнай з якіх патрабавала «прыняць да яе меры».
Чытайце таксама
